موصولہ اطلاع کے مطابق تصادم میں بری طرح زخمی بھولو گرجر نے دھولپور سے جے پور لے جاتے وقت جمعہ کی دیر رات دم توڑ دیا۔ پولیس نے بھولو گرجر کو بجری مافیا بتایا ہے۔ خیال رہے کہ اس تصاد م میں گولی لگنے سے بجری مافیا مورولی کے باشندہ سیوک نامی نوجوان کی موقع پر ہی موت ہوگئی تھی۔ تصادم میں پولیس کے دو جوانوں سمیت سات لوگ زخمی ہوگئے تھے۔
اس کے بعد کشیدگی کے حالات پیدا ہوگئے اور اسی کے مد نظر بھرت پور رینج آئی جی لکشمن گوڑ بھی دھولپور پہنچے۔ پولیس کانسٹبل ایشوری سنگھ کے پیر میں گولی لگی ہے، پولیس اہلکار روپیندر سنگھ کے پیر میں فریکچر آیا ہے۔ زخمیوں کو اسپتال میں داخل کرایا گیا۔ علاقہ میں کشیدگی کے پیش نظربڑی تعداد میں پولیس فورس تعینات کی گئی ہے۔
ایڈیشنل پولیس سپرنٹنڈنٹ راجیندر ورما کے مطابق بسئی ڈانگ کے ون وہار علاقہ میں چمبل ریت سے بھرے غیرقانونی ٹریکٹر ٹرالی نکلنے کی اطلاع ایس ایچ او ہیرالال مینا کو ملنے کے بعد کیوآر ٹی ٹیم کو لیکر ایس ایچ او انہیں پکڑنے جارہے تھے۔ بتایا گیا کہ مافیاوں نے پولیس کی گاڑی کو آگے سے ٹکر مارکر نقصان پہنچا یا اور پولیس پر فائرنگ شروع کردی۔
واقعہ کے بعد بڑی تعداد میں اسپتال میں گرجر سماج کے لوگوں کے جمع ہونے سے حالات کشیدہ ہوگئے۔ پولیس نے بتایا کہ صورتحال کنٹرول میں ہے۔
