رکن اسمبلی چیتن ڈوڈی نے ای ٹی وی بھارت سے بات کرتے ہوئے بتایا کہ فی الحال ہوٹل میں 109 ارکان اسمبلی موجود ہیں جو اشوک گہلوت کے حامی ہیں۔
چیتن ڈوڈی نے کہا کہ ہر سیاسی جماعت میں اس طرح کے اتار چڑھاؤ آتے رہتے ہیں اور کانگریس پارٹی ایک خاندان کی طرح ہے اور ہر خاندان میں سوچ اور نظریات میں اختلاف ہوتا ہے لیکن اس کا مطلب یہ نہیں کہ خاندان میں کسی قسم کی گڑبڑ ہے۔
انہوں نے کہا کہ کسی بھی قسم کے اختلاف کو سلجھانے کے لیے بزرگوں کی ضرورت پڑتی ہے اور کانگریس پارٹی کے اعلیٰ رہنما اس اختلاف کو ختم کرنے کی کوشش میں لگے ہوئے ہیں۔
اس دوران چیتن ڈوڈی نے یہ بھی کہا کہ ہمارے درمیان اس طرح کے اختلافات نہیں ہیں کہ کوئی دوسری جماعت یا کوئی دوسرے لوگ اس معاملے میں دخل اندازی کریں اگر زیادہ اور بڑا اختلاف ہوتا تو 109 اسمبلی رکن وزیر اعلیٰ کی حمایت کے لیے ایک ہی چھت کے نیچے اکٹھا نہیں ہوتے۔
انہوں نے پارٹی کی میٹنگ میں شامل نہ ہونے والے ارکان اسمبلی پر کاروائی کے سوال پر کہا کہ 'یہ تو پارٹی ہائی کمان ہی طے کریں گے کہ ان پر کیا کارروائی کی جائے فی الحال ہم تمام لوگ ایک ساتھ ہیں اور رہیں گے۔
