مسلم 'تنظیم سرو سماج سیوا' کی جانب سے ایک نئی پہل کی گئی ہے، اس تنظیم نے رواں برس 2021 میں 501 مسلم لڑکیوں کا بغیر پیسہ لیے نکاح کرائے جانے کا اعلان کیا ہے، تنظیم کے صدر محمد اکرم خان نے ای ٹی وی بھارت سے خاص بات چیت کے دوران کہا کہ ان کی تنظیم کی جانب سے پہلی اجتماعی شادی 10 اور 11 جنوری 2021 کو راجستھان کے کوٹا ضلع میں کرائی جائے گی۔
تنظیم کے صدر محمد اکرم خان نے بتایا کہ عالمی وباء کورونا کے قہر کی وجہ آج ہر طبقہ کافی متاثر ہوا ہے، اس کے مدنظر ہماری تنظیم کی جانب سے یہ تہیہ کیا گیا ہے کہ سال 2021 میں 501 بیٹیوں کا مفت نکاح کرائے گی۔
محمد اکرم کے مطابق یہاں پر کسی طرح سے کوئی شہر کی بندش نہیں ہیں بلکہ پوری ریاست کے کسی بھی علاقے کی بچی کا نکاح کرایا جائے گا، انہوں نے مزید معلومات دیتے ہوئے بتایا کہ 'ہماری تنظیم گزشتہ تین چار برس سے مسلسل کام کر رہی ہے، اس تنظیم میں ہمارے ساتھ میں بی جے پی کے سینئر رہنما امین پٹھان بھی جڑے ہوئے ہیں۔
تنظیم کے اغراض و مقاصد بیان کرتے ہوئے محمد اکرم نے بتایا کہ 'ہماری جانب سے خون عطیہ کیمپ کا بھی انعقاد کیا جاتا ہے، کسی بھی طرح کے بلڈز گروپ کے خون ہماری جانب سے مہیا کرایا جاتا ہے۔
