اشوک گہلوت حکومت کی جانب سے راجستھان مدرسہ بورڈ ایکٹ کو منظوری دینے کے بعد بی جے پی رہنماؤں کی جانب سے تنقیدوں کا سلسلہ جاری ہے۔
بی جے پی کے سینئر رہنما گیان دیو آہوجا نے مدرسوں سے متعلق متنازعہ بیان دیا جس کے بعد مسلم تنظیموں کی جانب سے ان کے خلاف سخت کاروائی کرنے کا ریاستی حکومت سے مطالبہ کیا جارہا ہے۔
راجستھان اردو اساتذہ تنظیم، اقلیتی افسر ملازم تنظیم، سوشل ڈیموکریسی پارٹی آف انڈیا سمیت دیگر مختلف تنظیموں نے گیان دیو آہوجا کے خلاف ایف آئی آر درج کرنے کا مطالبہ کیا ہے۔
مختلف تنظیموں نے بی جے پی رہنما پر مسلم مخالف بیان بازی کے ذریعہ ریاست میں حالات بگاڑنے کی کوشش کا الزام لگاتے ہوئے کہا کہ اگر آہوجا کے خلاف مناسب کاروائی نہ کی گئی تو سخت احتجاج کیا جائے گا۔ تنظیموں کے مطابق مدرسوں میں اقلیتی طلبہ تعلیم حاصل کرتے ہوئے مختلف شعبوں میں میں ملک و ریاست کا نام روشن کر رہے ہیں۔
