اچانک موسم کی تبدیلی سے ریاست کے کئی علاقوں میں ہونے والی ژالہ باری کے بعد سچن پائلٹ نے کہا کی صوبہ میں بے موسم کی برسات اور ژالہ باری کی وجہ سے کئی علاقوں میں فصلوں کو بھاری نقصان کی خبر کافی افسوس ناک ہے۔ اس وقت کسان بھائیوں کے درد کو وہ سمجھ سکتے ہیں۔
انھوں نے کہا کی اس مصیبت کی گھڑی میں ریاستی حکومت پوری طرح سے کسان بھائیوں کے ساتھ کھڑی ہے اور ان کی مدد کے لیے سنجیدہ ہے اس لیے ان کو ہر طرح کی مدد فراہم کی جائے گی۔
دوسری طرف بی جے پی نائب صدر اور سابق وزیراعلیٰ وسندھرا راجے نے کہا کہ ہفتہ کو دھول پور سمیت کئی علاقوں میں بے موسم کی بارش اور ژالہ باری سے فصلوں کو کافی نقصان پہنچاہے، جس سے ریاست کا کسان فکر مند ہے۔ انھوں نے موجودہ حکومت سے درخواست کی ہے کہ متاثرہ کسانوں کو فوری معاوضہ دیا جائے۔
بی جے پی ریاستی صدر ستیش پونیا نے کہا کہ ژالہ باری سے بھرت پور، دھول پور اور جھنجھنوں کے کسانوں کی کھڑی فصلوں کو کافی نقصان پہنچا ہے اس لیے حکومت انھیں فوری مدد مہیا کرائے۔ قابل ذکر ہے کہ ہفتہ کو موسم کی تبدیلی سے الور، کوٹہ، بوندی، دھول پور، جھنجھنوں اور جے پور اضلاع کے کچھ علاقوں میں بارش اور ژالہ باری ہوئی ہے۔
