ریاست راجستھان کے دارالحکومت جے پور کو ہیریٹیج لک دینے کے مقصد سے جے پور ہیریٹیج نگر نگم کی جانب سے تعمیری کام جاری ہے۔جس کی وجہ سے کئی دکانداروں کو نقصان کا سامنا کرنا پڑ رہا ہے۔
ان تعمیری کام کے تحت دکانوں کی چھتوں کو توڑا گیا ہے، جس کی وجہ سے ابھی حال ہی میں بارش ہونے کی وجہ سے بارش کا پانی دکانوں کے اندر داخل ہوگیا اور اس سے دکانوں میں رکھا ان کا سامان بھیگ کر خراب ہوگیا۔
واضح رہے کہ کورونا وبا کی وجہ سے ریاستی حکومت کی جانب سے لاک ڈاؤن نافذ ہونے کی وجہ سے یہ تمام دکانیں بند تھی لیکن آج جب یہ دکاندار بینک کے کسی کام سے اپنی دکان کھولنے کے لئے پہنچے تو یہاں کے حالات دیکھ کر وہ حیران رہ گئے۔
دکانداروں کا کہنا ہے کہ ایک تو کورونا کی وجہ سے ہم لوگوں کا کاروبار پوری طرح سے بند ہے اور اب جس طرح سے ہم لوگوں کی دکانوں کو نقصان ہوا ہے اس سے سے دوہری مار ہم لوگوں کو پڑ رہی ہے۔
دکانداروں نے علاقے کے دونوں ہی رکن اسمبلی اور راجستھان حکومت سے یہ مطالبہ کیا ہے کہ جلد سے جلد جے پور ہیریٹیج نگر نگم کی جانب سے شروع کیے گئے اس تعمیری کام کو جلد از جلد مکمل کیا جائے تاکہ آنے والے دنوں میں ہونے والی بارش سے ہم لوگوں کو اس طرح سے نقصان کا سامنا نہیں کرنا پڑے۔
بہرحال اب تو یہاں پر تعمیراتی کام کب مکمل ہوتا ہے یہ تو فی الحال وقت ہی بتائے گا، دکانداروں کا کہنا ہے کی دکانوں کو کافی نقصان ہوا ہے ان میں اکثریت دکان کپڑوں کی ہے۔
