ریاست راجستھان کے دارالحکومت جے پور میں اردو اساتذہ نے وزیراعلیٰ اشوک گہلوت اور وزیر تعلیم گووند سنگھ ڈوٹاسرا کا پتلا جلایا اور احتجاجی مظاہرہ بھی کیا۔ خیال رہے کہ یہ احتجاجی مظاہرہ راجستھان اردو اساتذہ تنظیم کے زیراہتمام منعقد کیا گیا تھا۔
واضح رہے کہ اردو اساتذہ کی تنظیم نے محکمہ تعلیم کی جانب سے دو ستمبر کو سرکاری سکولز میں تیسری زبان (اردو، سندھی اور پنجابی) کے پیش نظر جاری کیے گئے ایک آرڈر کی مخالفت کی تھی، اور احتجاجی مظاہرہ بھی کیا۔
راجستھان اردو اساتذہ تنظیم کے ریاستی صدر امین قائم خانی کا کہنا ہے کہ ہم سرکاری ملازم ہیں، لیکن اس سے پہلے ہم اپنے بچوں کے والدین بھی ہیں اس لیے جب ہماری مادری زبان پر خطرہ ہے تو ہم سرکار کے اس پروٹوکال کی پرواہ نہیں کرتے۔
انہوں نے کہا کہ سرکار ہمارے اوپر جو چاہے وہ کارروائی کرسکتی ہے ہم کسی چیز سے ڈرنے والے نہیں ہیں۔
واضح رہے کہ محکمہ تعلیم کی جانب سے دو ستمبر اور پانچ ستمبر کو ایک آرڈر جاری کیا گیا تھا جس کے بعد سے ہی راجستھان کی مسلم تنظیمیں اور راجستھان اردو اساتذہ کی تنظیمیں احتجاج کا انتباہ جاری کرچکی تھیں، جس کے بعد یہ احتجاج کیا گیا۔
احتجاجی مظاہرہ کرنے کے بعد ریاست کے وزیراعلیٰ اشوک گہلوت کے نام ایک میمورنڈم بھی ضلع کلکٹر کو دیا گیا۔
