ملک کی واحد درگاہ جسے سیاحتی مقام کے طور پر شامل کیا گیا

راجستھان کے ناگور میں واقع بڑے پیر صاحب شیخ سید سیف الدین عبدالوہابؒ کی درگاہ راجستھان ٹورزم میں شامل ہے۔یہ ملک کی ایسی پہلی درگاہ ہے جسے سیاحتی مقام میں شامل کیا گیا ہے۔

راجستھان کے ناگور ضلع کے سید سیف الدین جیلانی روڈ پر موجود بڑے پیر صاحب کی درگاہ بھارت میں قادریہ سلسلہ کا سب سے بڑا مرکز سمجھا جاتا ہے۔

درگاہ کے سجادہ نشین سید صداقت علی جیلانی کے مطابق درگاہ کے میوزیم کو راجستھان ٹورزم میں خاص توجہ دی گئی ہے۔

درگاہ کے میوزیم میں 800 سالہ قدیم بڑے پیر صاحب یعنی شیخ سید عبدالوہاب شاہ جیلانی کے دست مبارک سے تحریر کردہ قرآن شریف کے ساتھ ساتھ مختلف تاریخی نسخے اور تبرکات موجود ہیں جس کی زیارت کے لیے ملک اور بیرون ملک سے عقیدت مند و سیاحوں کا آنا جا لگا رہتا ہے۔

حضرت شیخ سید عبدالقادر جیلانی یعنی غوث پاک کے بڑے شہزادے عبدالوہاب جیلانی حضرت خواجہ غریب نواز کے ساتھ بھارت آئے تھے یہی وجہ ہے کہ ان کا مزار ناگور میں ہے اور ان کی درگاہ میں صوفی ازم کو فروغ دیتے قدیم تبرکات و نسخے موجود ہیں۔