اتوار کی شام راجستھان میں ضلع سروہی کے قریب رام پورہ میں شراب کے ٹھیکے پر سانپ نے دکاندار کو ڈس لیا، جس سے وہ شدید بیمار ہوگیا۔ اسے علاج کے لئے اسپتال بھیج دیا گیا ہے۔
معلومات کے مطابق سانپ خود ہی دکان پر نہیں آیا تھا، لیکن ایک شخص سانپ کے ساتھ مفت شراب لینے کے لئے وہاں گیا تھا۔ اس کے ہاتھ میں کٹا تھا جس میں سانپ تھا۔ اس نے دکاندار سے شراب کے دو پوے مانگے۔ اسی دوران دکاندار نے بغیر پیسے کے مطالبہ پر شراب دینے سے انکار کردیا۔ جس کے بعد اس شخص نے دکاندار نریندر سنگھ پر سانپ پھینک دیا۔ سانپ نے نریندر سنگھ کے ہاتھ پر ڈس لیا۔
نریندر سنگھ نے الزام لگایا کہ وہ دکان پر بیٹھا ہوا تھا، جب ایک سانپ پکڑنے والا رنجیت جو ہوم گارڈ بھی ہے، ٹھیکے پر آیا اور شراب طلب کرنے لگا۔ جس کے بعد جب اس نے انکار کیا تو اس نے کوبرا اس کے قریب پھینک دیا۔ جس کی وجہ سے نریندر سنگھ کو زہر کا اثر چڑھ گیا اور وہ شدید بیمار ہوگیا۔
جیسے ہی اس واقعے کی اطلاع ملی اسے فوری طور پر سروہی کے جنرل ہسپتال پہنچایا گیا۔ جہاں ابتدائی طبی امداد کے بعد اسے دوسرے ہسپتال میں ریفر کردیا گیا ہے۔
نیز شراب لینے والے شخص پر یہ الزام لگایا گیا ہے کہ وہ مفت میں شراب طلب کررہا تھا، جس کے بعد اس نے شراب نہیں دی اور دکان والے پر سانپ پھینک دیا۔
واضح رہے کہ سانپ پھینکنے والا شخص سانپ کو پکڑنے میں ماہر ہے اور اکثر لوگوں کی سانپ پکڑنے میں مدد کرتا ہے۔ پولیس فی الحال اس معاملے کی تحقیقات کر رہی ہے۔
