اقلیتی وزیر صالح محمد نے کہا ہے کہ آج حکومت راجستھان کے دو برس مکمل ہونے پر میں راجستھان کی عوام کا تہہ دل سے شکریہ ادا کرتا ہوں، کہ انہوں نے کانگریس پارٹی پر بھروسہ کیا اور راجستھان میں کانگریس حکومت بنائی۔
ای ٹی وی بھارت سے خاص بات چیت کے دوران راجستھان حکومت کے دو برس مکمل ہونے کے موقع پر اقلیتی وزیر صالح محمد نے کہا کہ گزشتہ بی جے پی حکومت کی جانب سے اقلیتی طبقے کے لئے کسی طرح کا کوئی کام نہیں کیا گیا جو اسکیم چلائی جا رہی تھی ان اسکیم کو بھی بند کر دیا گیا۔
انہوں نے کہا کہ آج راجستھان کی حکومت بہترین کام کر رہی ہے، ہماری حکومت سے غریب، نوجوان، کسان ہر طبقہ خوش ہے۔ دو برس میں اقلیتی طبقے کے لیے سب سے بڑا کام کرنے کے سوال پر انہوں نے کہا کہ گزشتہ 18 سے 20 برس سے یہ مطالبہ کیا جا رہا تھا کہ راجستھان مدرسہ بورڈ ایکٹ بنایا جائے، اور ہمیں کافی خوشی ہے کی ہماری حکومت نے مدرسہ بورڈ ایکٹ بنایا۔
انہوں نے کہا کہ ہماری حکومت کی جانب سے مسلمانوں کی ترقی کیلئے ہر کام کیے گئے، مدرسوں کو ماڈل بنانے کا کام ہماری حکومت نے کیا، مدرسوں میں انٹرنیٹ لگوانے کا کام ہماری حکومت کی جانب سے کیا گیا، مدرسوں میں اسمارٹ کلاس لگانے کا کام ہماری حکومت نے کیا، مدرسوں میں فرنیچر لگوانا سب ہم نے کیا۔
مدرسہ بورڈ کے صدر کے سوال پر انہوں نے کہا کہ جلدی ہی مدرسہ بورڈ کے صدر کو بھی منتخب کر دیا جائے گا۔ وہیں مسلم قوم کی ناراضگی کے سوال پر کہا کہ قوم میں کچھ لوگ بے فضول باتیں لوگوں کے ذہن میں اتار رہے ہیں جو غلط ہے۔
مدرسہ پیرا ٹیچر کو پرماننٹ کرنے کے سوال پر انہوں نے کہا کہ ہماری حکومت کی جانب سے کمیٹی بنائی گئی ہے، جس نے اپنی رپورٹ ریاست کے وزیر اعلی اشوک گہلوت کو دے دی ہے جلد ہی ان کے لیے خوشخبری سنائی جائیگی۔
