جے پور: راجستھان کے گورنر کلراج مشرا نے آج یہاں وزیر اعظم نریندر مودی کی کتاب ’ایگزام واریئرز‘ کا ہندی اور انگریزی ورژن کا اجرا کیا۔ مشرا نے راج بھون میں اجرا کے بعد کہا کہ یہ نہ صرف طلباء بلکہ اساتذہ اور والدین کے لئے بھی بہت اہم کتاب ہے۔ انہوں نے بتایا کہ پی ایم مودی نے بنیادی طور پر یہ کتاب امتحانات کے دوران بچوں میں تناؤ کے تناظر میں تحریر کی ہے۔ اس میں لائف مینجمنٹ پر بھی خاص معلومات دی گئی ہیں۔
انہوں نے کہا کہ کتاب میں طلباء کی مدد کے لیے یوگا کے بہت سے آسنوں کے ساتھ ساتھ جوش، ولولے اور جوش و خروش کے ساتھ امتحان دینے، ہنستے ہوئے امتحان میں جانا اور مسکراتے ہوئے واپس آنا، حال میں جینا، کھیلوں کے ساتھ زندگی سنوارنے وغیرہ میں بہتری لانے سے متعلق اہم باتیں بتائی گئی ہیں۔ کتاب میں اساتذہ کو خط لکھنے کے علاوہ علم کو مستقل اثاثہ بتا کر زندگی بھر سیکھنے کی اپیل کی گئی ہے۔ واضح رہے کہ مسٹر مودی نے ’پرکشا پہ چرچہ‘ مواصلاتی مقصد سے اسے لکھا تھا۔ اس کا 11 زبانوں میں ترجمہ ہو چکا ہے۔
یہ بھی پڑھیں: Ambedkar and Modi Book Launch آج 'امبیڈکر اور مودی' کتاب کا اجراء ہوگا
واضح رہے کہ اس سے پہلے وزیر اعظم نریندر مودی نے 'پریکشا پہ چرچا' پروگرام میں طلبہ کو مدعو کیا تھا۔ وزیر اعظم مودی نے طلباء کے والدین اور اساتذہ کو بھی 'پریکشا پہ چرچا' پروگرام میں اپنے خیالات کا اشتراک کرنے کے لیے مدعو کیا تھا۔ واضح رہے کہ 150 سے زائد ممالک کے طلباء، 51 ممالک کے اساتذہ اور 50 ممالک کے والدین نے امتحانات کے حوالے سے پریکشا پہ چرچا' میں خود کو رجسٹر کرایا ہے۔
یو این آئی
