اظہار رائے کی آزادی کے نام پر مذہبی جذبات کو مجروح کرنا صحیح نہیں: مفتی خالد

پیغمبر اسلام محمدﷺ کی شان میں گستاخی کرنے والوں کا دفاع کرنے پر فرانس کے صدر ایمیونل میکخواں کے خلاف مسلمانوں میں شدید غم و غصہ دیکھا جا رہا ہے۔ بھارت کے مسلمان بھی فرانس کے صدر کے خلاف احتجاج اور معافی کا مطالبہ کر رہے ہیں۔ اسی سلسلے میں ریاست راجستھان میں بھی میمورنڈم بھی سونپا گیا۔

ای ٹی وی بھارت کے نمائندے نے اسی سلسلے میں تحریک علماء ہند سے تعلق رکھنے والے مفتی خالد ایوب مصباحی سے بات کی تو انہوں نے کہا کہ، ' فرانس میں اظہار خیال کی آزادی کے نام پر جو کچھ ہوا ہے وہ لائق مذمت ہے۔ اظہار رائے کی آزادی عالمی قانون کے مطابق سب کا حق ہے، لیکن اس کے بہانے کسی کی توہین ہوتی ہے یا جذبات کو ٹھیس پہنچتی ہے خاص طور پر مذہبی جذبات تو وہ بہت ہی افسوسناک ہے۔'

مصباحی نے کہا کہ، 'اظہار رائے کی آزادی کے نام پر اگر ہم کسی مذہب کے نام پر اپنی بھڑاس نکالتے ہیں یا اسلامی فوبیا کا مظاہرہ کرتے ہیں تو یہ کسی طور پر صحیح نہیں ہے۔'

ساتھ ہی انہوں نے کہا کہ، 'ہم جتنی مذمت دہشت گردی کا کرتے ہیں اتنا ہی اس بات کا کرتے ہیں کہ کسی بھی شخصیت کو یا کسی بھی مقدس جماعت کو اظہار رائے کی آزادی کے نام پر نشانہ بنایا جائے۔'

عید میلاد النبی کے سوال پر مفتی خالد نے کہا کہ، 'آج کافی خوشی کا موقع ہے اور ایک افسوس یہ بھی ہے کہ اس مرتبہ جلوس اے محمدی نہیں نکالا جا سکا۔'