جودھ پور: راجستھان ہائی کورٹ کے سینئر جج سندیپ مہتا نے بھارتی کرکٹ ٹیم کے کھلاڑی ہاردک پانڈیا اور کے ایل راہل کے ذریعہ دائر کی گئی عرضی کی آج سماعت کرتے ہوئے دونوں کو تفتیشی آفیسر کے سامنے قانونی نمائندے یا قانونی مشیر کے ذریعہ پیش ہونے کا حکم دیا۔
اطلاعات کے مطابق ڈی آر میگھوال کی جانب سے سنہ 2019 میں 'کافی ود کرن' شو میں خواتین کے خلاف جنسی زیادتی سے متعلق ناشائستہ تبصرہ کرنے کے معاملے میں ہاردک پانڈیا اور کے ایل راہل کے خلاف لونی پولیس اسٹیشن میں مقدمہ درج کرایا گیا تھا۔
جس کے بعد دونوں کھلاڑیوں نے ضابطہ فوجداری کے سیکشن 482 کے تحت ایف آئی آر کو منسوخ کرنے کے لئے عرضی داخل کی تھی۔ جس کے بعد ہائی کورٹ نے گرفتاری پر پابندی عائد کرتے ہوئے کیس کی تحقیقات پر روک لگا دی تھی ۔
شکایت کنندہ کی جانب سے پیش ہوئے وکیل انیل بیدان ہالو اور مہیپال سنگھ چرن نے کہا کہ دو سال میں اس معاملے کی جانچ نہیں ہوئی ہے۔ درخواست گزار تفتیشی آفیسر کے ساتھ تعاون کر رہے ہیں۔ اس لئے تحقیق متاثر ہو رہی ہے۔
وہیں وکیل پنکج گپتا نے درخواست گزاروں کی جانب سے جواب دیتے ہوئے کہا کہ دونوں عرضی گزار بھارتی کرکٹ ٹیم کے کھلاڑی ہیں اور فی الحال آسٹریلیا میں سیریز کھیل رہے ہیں۔
ہائی کورٹ نے گرفتاری پر روک لگاتے ہوئے درخواست گزاروں کو قانونی نمائندے یا قانونی مشیر کے ذریعے تفتیشی آفیسر کے سامنے اپنا معاملہ پیش کرنے کا حکم دیا ہے۔ اگلی سماعت 5 فروری کو مقرر کرتے ہوئے سرکاری وکیل کو اس کی تفصیلی رپورٹ پیش کرنے کا حکم دیا ہے۔
