ریاست راجستھان کے دارالحکومت جے پور میں مسلم سماجی تنظیموں کے ذمہ داران نے راجستھان مسلم وقف بورڈ کے چیئرمین ڈاکٹر خانو خان بودھوالی کو ایک میمورنڈم دیا اور میمورنڈم میں یہ کہا گیا ہے کہ جو دارالحکومت جے پور کے موتی ڈونگری روڈ علاقے میں واقع مسلم مسافر خانہ کمیٹی ہے اس کمیٹی سے تولیت کو ختم کیا جائے۔
جب مسجد انتظامیہ کمیٹی جے پور کے سابق سیکریٹری انور شاہ نے ای ٹی وی بھارت سے خاص بات چیت کے دوران بتایا کہ کوئی بھی شخص اپنی مرضی سے کسی بھی جائیداد کو فی سبیل اللہ کر دیتا ہے اور اس جائیداد پر کسی بھی خاص آدمی کو ہمیشہ کے لیے مقرر کر دینا غلط بات ہے۔
اس لیے آج ہم تمام لوگ یہاں پر پہنچے ہیں اور جو مسلم مسافر خانہ کمیٹی کے ساتھ میں تولیت الفاظ کا استعمال کیا گیا ہے اس کو ختم کرنے کا مطالبہ کر رہے ہیں۔ یہ ہمارا مطالبہ جائز ہے اس جانب وقف بورڈ کو توجہ دینی چاہیے اور ہم لوگوں کو آج راجستھان مسلم وقف بورڈ کے چیئرمین ڈاکٹر خانو خان بودھوالی کی جانب سے یہ بھروسہ دلایا گیا ہے کہ ہم آپ لوگوں کے مطالبہ کو وقف کے ممبروں کے سامنے رکھیں گے۔
وہی انور شاہ کا کہنا ہے کہ اگر ہمارے مطالبات کی جانب توجہ نہیں دی جاتی ہے تو مسلم برادری کے لوگ سڑکوں پر اتریں گے اور احتجاجی مظاہرہ کریں گے۔
ایک سوال پر انور شاہ کا کہنا تھا کہ اتنے روز تک ہم لوگوں کو معلوم نہیں تھا کہ مسلم مسافر خانہ کمیٹی تولیت کے طور پر مقرر کی گئی ہے اس لیے ہم مخالفت نہیں کر رہے تھے، لیکن اب ہم لوگوں کو پتہ چلا ہے، اس لیے ہم چیئرمین سے ملاقات کرنے کے لیے یہاں پہنچے ہیں۔
کیا ہوتی ہیں تولیت؟
انور شاہ نے تولیت کے بارے میں معلومات دیتے ہوئے بتایا کہ وقف کی گئی جگہ پر کسی بھی خاص کمیٹی کو ہمیشہ کے لیے مقرر کر دینا تولیت کہلاتا ہے۔
