حضرت خواجہ غریب نواز رحمتہ اللہ علیہ کی درگاہ کے حمیدیہ دالان میں یہ چراغ دان ہے جہاں اکثر عقیدت مند 101 چراغ روشن کر کے بارہ فٹ بلند اس چراغدان کو روشن کرتے ہیں۔لیکن اب عقیدت مند اس کے پاس جانے سے پرہیز کرتے ہوئے نظر آرہے ہیں۔
خادموں کے مطابق جڑ سے کمزور ہوچکا ہوا یہ چراغ دان ایک طرف سے جھک چکا ہے، جس کی وجہ سے درگاہ میں کوئی بھی بڑا حادثہ پیش آسکتا ہے۔
خادم سید معین میاں چشتی نے بتایا کہ یہ چراغ دان اوپر سے ٹیڑھا ہوگیا ہے، اس میں کئی جگہ سے دراریں آگئی ہیں۔ہم نے لاک ڈاؤن سے قبل درگاہ کے کچھ حصے کی مرمت کروائی تھی۔اس لیے درگاہ کمیٹی سے اپیل ہے کہ وہ اس جانب توجہ مرکوز کریں ورنہ کوئی بڑا حادثہ پیش آسکتا ہے۔
درگاہ کے خادم کا الزام ہے کی درگاہ کمیٹی اس چراغدان کو درست کروانے میں لاپرواہی دکھا رہی ہے، جس کی وجہ سے پانچ سو برس قدیم چراغ گر سکتا ہے۔ جیسا کہ اس سے قبل برسات کے موسم میں اسی کے نزدیک بنا دوسرا چراغدان بھی گر گیا تھا، لیکن اس وقت غنیمت رہی تھی کہ لاک ڈاؤن کی وجہ سے درگاہ بند تھی اور کوئی زائرین وہاں موجود نہیں تھا ۔لیکن اب درگاہ بھی کھلی ہوئی ہے اور زائرین بھی موجود ہیں۔
خادم قطب الدین سخی نے بتایا کہ لاک ڈاؤن کے دوران درگاہ میں موجود دوسرا چراغ دن بھی گر گیا تھا اور اب اس چراغ دان کی بھی حالت خستہ ہے، جس سے کسی بھی قسم کا حادثہ ہونے کا خدشہ بنا ہوا ہے۔اس لیے اس مرمتی کام کو جلد از جلد شروع کیا جانا چاہیے۔
واضح رہے کہ درگاہ میں اسی طرح کئی ایسی تاریخی نشانیاں موجود ہیں، جن کی حالت خستہ ہوگئی ہے۔جس پر درگاہ انتظامیہ کو توجہ دینے کی ضرورت ہے، ورنہ کبھی بھی کوئی بھی حادثہ پیش آسکتا ہے۔
