راجستھان حکومت نے کورونا وائرس وبأ کے سبب گائیڈ لائن جاری کرکے کسی بھی درگاہ چادر چڑھانے پر روک لگادی تھی لیکن اس کے باوجود بھی کانگریس رہنما ہاردک پٹیل کو درگاہ کی زیارت کراتے ہوئے انھیں چادر اور پھول دیے گئے اور انھوں نے درگاہ پر چادر چڑھائی۔
درگاہ تھانہ پولیس نے اس معاملے میں کیس درج کرکے تحقیقات شروع کردی ہے۔ درگاہ تھانہ انچارج رمیندر سنگھ ہاڈا کے مطابق 21 نومبر کو ہاردک پٹیل کو اجمیر درگاہ کی زیارت کروائی گئی تھی۔
اس دوران شاہ فیصل نیازی نامی ایک خادم نے بلند دروازے پر اچانک چادر و پھول کی ٹوکری ہاردک پٹیل کے سر پر رکھ کر ان کے ساتھ فوٹو کھنچوائی اور انھیں زیارت بھی کرائی۔
پولیس نے کہا کہ پابندی کے باوجود درگاہ میں چادر اور پھول لے جانا ریاستی حکومت کی جانب سے جاری کردہ گائیڈ لائن کی خلاف ورزی ہے۔
اسی لیے پولیس نے مذکورہ خادم کے خلاف مقدمہ درج کرلیا ہے اور اس کے بعد سے درگاہ کے تمام دروازوں پر نگرانی بڑھادی گئی ہے۔
اس کے علاوہ سی سی ٹی وی کیمروں سے نگرانی بھی کی جارہی ہے اور درگاہ کے تمام خادموں کو مخصوص ہدایت دی گئی ہے کہ موجودہ وقت میں وہ صبر سے کام لیں۔
