راجستھان اسمبلی میں گہلوت حکومت کی جانب سے اعتماد کا ووٹ حاصل کرنے کے بعد اسمبلی کے باہر کانگریس ترجمان رندیپ سنگھ سرجیوالا نے میڈیا نمائندوں سے بات کرتے ہوئے کانگریس حکومت کی جیت کو راجستھان کے 8 کروڑ عوام کی جیت سے تعبیر کیا۔
انہوں نے کہا کہ ملک بھر میں مودی حکومت کی جانب سے جمہوریت کو کھوکھلا کرنے کی سازشیں کی جارہی ہیں لیکن آج کی جیت ایسے ماحول میں ایک نئی روشنی لیکر آئے گی۔
کانگریس ترجمان نے کہا کہ آج خرید و فروخت کی سیاست کرنے والوں اور مغرور حکمرانوں کو شکست کا سامنا کرنا پڑا ہے۔ انہوں نے کہا کہ ملک بھر میں جمہوریت کی دھجیاں اڑانے والوں کو یہ سمجھ لینا چاہئے کہ وہ راجستھان ایسا کرنے سے قاصر رہیں گے۔
انہوں نے کہا کہ ہمیشہ جمہوریت کی جیت ہوئی ہے اور کانگریس نے جنگ آزادی میں گورے انگریزوں سے لڑکر کامیابی حاصل کی تھی جبکہ ہم موجودہ ماحول میں اس بات پر یقین رکھتے ہیں کہ جمہوریت کی بقا کےلیے مودی سرکار میں بیٹھے کالے انگریزوں سے جیت کر ملک کے آئین کی حفاظت کریں گے۔
