راجستھان میں رمضان المبارک کے مقدس مہینے کی پہلی سحری ہفتہ (25 اپریل) کی صبح کی گئی ہے۔
ریاست میں مختلف قرنطینہ مراکز میں موجود کورونا وائرس سے متاثرین نے بھی روزہ کے لیے سحری کیا ہے۔ اس وقت انھیں کھانے پینے کی اشیا اور دیگر سامنان فراہم کیے گئے۔
ایسے میں ان لوگوں کو کسی طرح سے کوئی دقت اور پریشانی کا سامنا نہ کرنا پڑے اس کے لیے انتظامیہ کی جانب سے سحری اور افطار کرانے کے آرڈر جاری کیے گئے ہیں۔
راجستھان کے ناگور، اجمیر اور بھرپور کلکٹر کی جانب سے جاری بیان میں کہا گیا ہے کہ 'جو لوگ کورونا کورنٹائن سینٹر(قرینطینہ مراکز) میں مقیم ہیں، ان تمام لوگوں کے لیے سحری اور افطار کرنے کی سہولیات مہیا کرنے کے آرڈر جاری کیے گئے ہیں، ان آرڈرز میں یہ کہا گیا ہے کہ سحری اور افطار کرنے کی اجازت دی جاتی ہے'۔
واضح رہے کہ ریاست راجستھان میں کرونا وائرس کے پیش نظر چند خاندان ایسے بھی ہیں جو کورنٹائن سینٹر میں قیام کیے ہوئے ہیں، جنہیں دیکھتے ہوئے مسلم رہنماؤں کی جانب سے ریاست کے وزیراعلیٰ اشوک گہلوت کو خط لکھا گیا تھا۔
اس طرح کے آرڈر جاری ہونے کے بعد مسلم رہنماؤں کی جانب سے خوشی کا اظہار بھی کیا جارہا ہے-
