ریاست راجستھان کے شہر اجمیر میں عالمی شہرت یافتہ صوفی بزرگ حضرت خواجہ معین الدین چشتی رحمۃ اللہ علیہ کے 809 ویں عرس مبارک کی پرچم کشائی کی رسم 8 فروری کو ادا کی جائے گی۔
کووڈ - 19 گائیڈ لائن کے تحت رواں برس عرس کی تقاریب مکمل طور طریقے سے عمل میں نہیں لائی جائے گی، اس دوران ملک بھر سے کثیر تعداد میں آنے والے زائرین کو ضلع انتظامیہ نے مشروط شرکت کی اجازت دی ہے۔
اس سلسلے میں درگاہ کمیٹی اور خادموں سمیت درگاہ دیوان کے نمائندوں نے ضلع انتظامیہ کے ساتھ میٹنگ بھی کی ہے۔
آئندہ آٹھ فروری کو خواجہ غریب نوازؒ کے عرس کا جھنڈا درگاہ کے بلند دروازہ پر پیش کیا جائے گا۔ پرچم کشائی کی اس رسم کے لیے درگاہ کے گنبد اور تاریخی بلند دروازہ پر رنگ و روغن اور سجاوٹ کا کام بھی شروع کردیا گیا ہے۔
غور طلب ہے کی سالانہ عرس کا آغاز 14 فروری سے ہوگا اور 20 فروری یعنی 6 رجب کو قل کی رسم ادا کی جائے گی۔ کورونا وبا کے پیش نظر عرس کی تمام رسم و روایات حکومت کی گائیڈ لائن کے مطابق ادا کی جائے گی۔
