اجمیر: عیدالاضحی کے موقع پر جنتی دروازہ کھولا جائے گا

اجمیر شریف میں بھی عید کی تیاریاں شروع ہوگئی ہیں۔ اجمیر شریف درگاہ میں اس پاکیزہ موقع پر جنتی دروازہ بھی کھولا جائے گا۔

سلطان الہند حضرت خواجہ غریب نواز رحمۃ اللہ علیہ کی درگاہ کے خادم ایس ایف حسن چشتی نے بتایا کہ 28 جولائی کو خواجہ صاحب کی ماہانہ چھٹی شریف منائی جائے گی جبکہ 1 اگست کو عید الاضحی منائی جائے گی۔

اس موقع پر خواجہ کی درگاہ میں مکہ و مدینہ شریف کا غلاف بھی دیدار کے لیے رکھا جائے گا اس طرح ملک میں امن و امان اور کورونا وبا کے خاتمے کی خصوصی دعا مانگی جائے گی۔

فی الحال ابھی خواجہ صاحب کی درگاہ میں عام زائرین کا داخلہ ممکن نہیں ہے۔ کورونا وبا کی وجہ سے 22 مارچ سے درگاہ شریف کو عام زائرین کے لیے بند کر دیا گیا تھا۔ امید کی جا رہی ہے کہ حکومت کی جانب سے عید الاضحی کے موقع پر کچھ پابندیوں کے ساتھ درگاہ شریف کو کھولا جا سکتا ہے۔