اجمیر شریف:امام حسین کی یاد میں خون عطیہ کیمپ منعقد

اجمیرشریف درگاہ کے خادموں کی جانب سے آج 'خون دو زندگی دو' کے نعرے کے ساتھ ایک خون عطیہ کیمپ منعقد کیا گیا۔

ریاست راجستھان کے شہر اجمیر میں واقع درگاہ حضرت خواجہ معین الدین چشتی کے خادموں کی جانب سے ایک روزہ خون عطیہ کیمپ کا انعقاد کیا گیا۔شہدائے کربلا کو خراج عقیدت پیش کرنے کی نسبت سے عاشق حسین نے اپنے خون کا عطیہ کیا۔


حضرت خواجہ معین الدین چشتی رحمتہ اللہ علیہ کے درگاہ کے خادموں کی جانب سے خون عطیہ کے لیے ایک کیمپ لگایا گیا۔ اس کیمپ میں عاشق حسین نے بڑھ چڑھ کر حصہ لیا اور اپنے خون کا عطیہ حضرت امام حسین کے نام پیش کیا۔شہدائے کربلا کی یاد میں خدمت خلق کا جذبہ مسلم نوجوانوں میں دیکھا گیا۔ 18 برس سے لے کر 39 سال کی عمر کے عقیدت مندوں نے 143 یونٹ خون کا عطیہ پیش کیا۔

'خون دو زندگی دو' کے نعرے سے منعقد اس کیمپ میں انجمن سید زادگان کے سابق صدر غلام کبریہ چشتی نے خصوصی مہمان کے طور پر شرکت کی اور خون عطیہ کیمپ منعقد کی ستائش کرتے ہوئے اسے ایک نیک قدم بتایا۔ واضح رہے کہ محرم الحرم کے مہینہ میں شہدائے کربلا کی یاد میں مختلف مقامات پر عاشق حسین کی جانب سے خون عطیہ کیمپ لگایا جاتا ہے۔اسی خدمت خلق اور امام حسین کی یاد میں اجمیر میں بھی اس طرح کے کیمپ منعقد کیے جاتے ہیں۔