ریاست پنجاب کے ضلع سنگرور کے لونگوال کے قریب اسکول وین میں آتشزدگی کے واقعے میں چار بچوں کی ہلاکت پر صدمے اور رنج کا اظہار کرتے ہوئے وزیراعلی پنجاب کیپٹن امریندر سنگھ نے متاثرہ افراد کے اہل خانہ کو 7.5 لاکھ روپے معاوضے کے طور پر دینے کا اعلان کیا اور اس واقعے کی تحقیقات کے لیے مجسٹریل انکوائری کا حکم بھی دیا ہے۔
سی ایم او کی طرف سے ہفتے کو جاری کردہ ایک پریس ریلیز کے مطابق'وزیراعلیٰ نے محکمہ ٹرانسپورٹ کو بھی حکم دیا کہ وہ فوری طور پر اسکولز کی تمام بسوں کی ریاستی سطح پر چیکنگ کریں تاکہ طلبا کی حفاظت کو یقینی بنایا جاسکے اور مستقبل میں اس طرح کے حادثات سے بچا جاسکے۔
کیپٹن امریندر سنگھ نے متعلقہ محکمے کے افسران کو بھی ہدایت دی کہ 'موٹر وہیکل ایکٹ کی دفعات کی خلاف ورزی کرنے والی اسکولز کی گاڑیوں اور اسکول کے انتظامیہ پر بھی سخت نگرانی رکھی جائے۔'
دراصل آتشزدگی کا واقعہ اس وقت پیش آیا جب اسکول وین ہفتہ کے روز لونگوال کے ایک نجی اسکول کے نرسری ونگ کے بچوں کو اپنے اپنے پوائنٹ پر چھوڑنے جارہی تھی۔
اس حادثے کے سلسلے میں آئی پی سی کی دفعہ 304 کے تحت مقدمہ درج کیا گیا ہے۔
