پنجاب کے سابق ڈی جی پی کی گرفتاری پر روک

سپریم کورٹ نے ایک جونیئر انجینئر کے اغواء اور قتل کے 29 سال پرانے مقدمہ میں پنجاب کے سابق پولس ڈائریکٹر جنرل (ڈی جی پی) سمیدھ سنگھ سینی کی گرفتاری پر منگل کے روز اگلے حکم تک روک لگا دی۔

جسٹس اشوک بھوشن کی زیر صدارت تین رکنی بنچ نے سابق ڈی جی پی کو گرفتاری سے راحت دے دی۔ عدالت عظمی نے کہا کہ "ہم نے اگلے حکم تک ان (سمیدھ سینی) کی گرفتاری پر روک لگا دی ہے"۔
عدالت عظمی نے مسٹر سینی کی پیشگی ضمانت کی درخواست پر حکومت پنجاب سے اپنا موقف پیش کرنے کو کہا ہے۔ عدالت عظمی نے ان سے اس معاملے کی تحقیقات میں پویس کے ساتھ تعاون کرنے کو بھی کہا ہے۔
مسٹر سینی نے پنجاب اور ہریانہ ہائی کورٹ میں پیشگی ضمانت کی درخواست خارج ہونے کے بعد عدالت عظمیٰ سے رجوع کیا ہے اور انھوں نے گرفتاری سے راحت اور پیشگی ضمانت کی اپیل کی ہے۔
اس مقدمہ کی دوبارہ سماعت ممکنہ طورپر چار ہفتے کے بعد ہوگی۔