جالندھر: الیکشن کمیشن کی جانب سے جالندھر لوک سبھا سیٹ کے ضمنی انتخاب کے اعلان کے فوراً بعد ڈپٹی کمشنر کم ضلع الیکشن افسر جسپریت سنگھ نے بدھ کو تمام افسران کو انتخابی ضابطہ اخلاق پر عمل کو سختی سے نافذ کرنے کی ہدایت دی۔ڈپٹی کمشنر نے سرکاری محکموں کے افسران کو یہ بھی ہدایت کی کہ وہ 24 گھنٹے کے اندر اپنے دفاتر، محکمانہ ویب سائٹس وغیرہ سے سیاسی رہنماؤں کی تصاویر فوری طور پر ہٹا دیں۔ انہوں نے کہا کہ 72 گھنٹے میں نجی جائیدادوں سے سیاسی اشتہارات ہٹائے جائیں۔
مختلف انتخابی ڈیوٹیوں پر تعینات تمام نوڈل افسروں کو ان کے فرائض سے آگاہ کرتے ہوئے ڈپٹی کمشنر نے کہا کہ الیکشن کمیشن نے منصفانہ اور پرامن انتخابات کو یقینی بنانے کی ہدایات دی ہیں۔ انہوں نے چیف الیکٹورل آفیسر پنجاب کے ذریعے الیکشن کمیشن کو بھیجی جانے والی تمام روزانہ کی رپورٹس کی بروقت فراہمی کو یقینی بنانے کی ہدایت کی۔
جسپریت سنگھ نے کہا کہ انتخابی اخراجات اور امن و امان کی نگرانی کے لیے اسمبلی حلقہ کی سطح سے لے کر ضلع سطح تک مختلف ٹیمیں تشکیل دی گئی ہیں۔ انہوں نے کہا کہ آر او، ایم سی ایم سی، ڈی ای ایم سی، شکایت سیل، ڈیلی رپورٹ سیل وغیرہ کے علاوہ اسمبلی کی سطح پر الگ الگ ٹیمیں بنا کر ٹیم ممبران کو پہلے دور کی ٹریننگ دی گئی ہے۔ واضح رہے کہ کرناٹک اسمبلی انتخابات کی تاریخوں کا اعلان ہوگیا۔ کرناٹک میں 10 مئی کو انتخابات ہوں گے اور 13 مئی کو نتائج کا اعلان ہوگا۔
یو این آئی
