ریاست پنجاب میں پنجاب کانگریس کمیٹی کے صدر سنیل جاکھڑ نے کہا ہے کہ کورونا کے قہر اور مرکز کی غلط اقتصادی پالیسیز کی وجہ سے مندی کی مار سے پریشان لوگوں کو مودی حکومت مہنگے پٹرولیم مصنوعات بیچ کر لوٹ رہی ہے۔
انہوں نے کہا کہ بین الاقوامی تیل بازار میں کچے تیل کی قیمت اب اپنی سب سے نچلی سطح پر ہے، لیکن مرکزی حکومت ملک کے عوام کو مہنگا تیل بیچ رہی ہے۔
انہوں نے کہا کہ اس وقت معیشت نازک دور سے گزر رہی ہے، ترقی کی شرح نچلی سطح پر ہے، روزگار کے مواقع کم ہورہے ہیں، لوگوں کی آمدنی کم ہورہی ہے اور بینک دیوالیہ ہونے کے دہانے پر ہیں۔
ایسے برے اقتصادی حالات میں ہی کورونا وائرس کی وجہ سے پیدا ہوئے بحران سے حالات مزید خراب ہوگئے ہیں۔
انہوں نے کہا کہ اقتصادی مندی کے ایسے حالات میں لوگ امید کرتے ہیں کہ ہماری حکومت ہمارے ساتھ کھڑی ہوگی، لیکن اسے ملک کی بدقسمتی کہا جائے گا کہ اس مشکل دور میں بھارتی حکومت لوگوں کی مشکلوں کو حل کرنے کے بجائے پٹرولیم مصنوعات کی قیمتوں کو بے قابو کرکے ملک کے لوگوں اور کاروبار کو پوری طرح تباہ کرنے کا کام کررہی ہے۔
انہوں نے کہا کہ کورونا کے قہر کی وجہ سے معیشت کو بڑا خطرہ ہے، بھارتی حکومت نے ٹیکس اور بڑھادئے ہیں، تا کہ لوگوں تک کچے تیل کی قیمتوں میں آئی کمی کا فائدہ نہیں پہنچے۔
انہوں نے مودی حکومت سے مطالبہ کیا کہ مشکل اقتصادی حالات اور کورونا کے خطرے کے پیش نظر پٹرولیم مصنوعات کی قیمتوں پر قابو کیا جائے، اور لوگوں کی مدد کی جائے۔
