ترال: جنوبی کشمیر کے ترال میں امسال آر اینڈ بی محکمہ نے نودل سے دو کلومیٹر سڑک کی تعمیر و تجدید اور میکڈمایزیشن کا کام کیا گیا۔ جس کی وجہ سے مقامی لوگوں میں خوشی کا ماحول ہے اور انہیں امید ہے کہ اب وہاں تعمیر وترقی کا ایک نیا دور شروع ہوگا۔ جس کی وجہ سے یہ گاوں بھی ترقی کی راہ پر گامزن ہوگا۔
ای ٹی وی بھارت کے ساتھ بات کرتے ہوئے مقامی لوگوں نے بتایا کہ سڑک کی تعمیر سے قبل جب بھی وہ تعمیری میٹریل لاتے تھے۔تو انھیں دو کلومیٹر دور سے کندھوں پر لانا پڑتا تھا۔ جبکہ اسکول جانے والے طلباء کے لئے سڑک رابطے کی عدم دستیابی مشکلات کا باعث تھی۔ لیکن اب صورتحال میں تبدیلی آگئی ہے۔
مقامی لوگوں نے ایل جی انتطامیہ کے ساتھ ساتھ آر اینڈ بی محکمے کا شکریہ ادا کیا ہے، جن کی کاوشوں سے عوام کی دیرینہ خواہش پوری ہو گئی۔
آر اینڈ بی کے ایک عہدیدار پرویز چودھری نے لوگوں سے اپیل کی کہ سڑک کی تعمیر اب محکمہ کی جانب سے قلیل مدت میں مکمل کر لی گئ ہے اور اب لوگوں کو چاہیے کہ سڑک کی حفاظت کو یقینی بنائیں اور اس پر پانی نہ ڈالیں کیوں کہ یہ آپکا اپنا اثاثہ ہے۔
