عالمی وبا کورونا وائرس کی وجہ سے قربانی جیسا واجب عمل ترک نہیں کیا جا سکتا ہے۔ البتہ حالات کی نزاکت کو دیکھتے ہوئے سماجی دوری کو بنائے رکھنا اور صفائی کا مناسب انتظام ضرور کرنا چاہئے۔ ان خیالات کا اظہار ترال کے معروف عالم دین اور دارلعلوم دار ارقم کے سربراہ قاضی فاروق احمد نے ای ٹی وی بھارت کے ساتھ ایک خصوصی گفتگو کے دوران کیا۔
قاضی فاروق نے بتایا کہ 'عالمی وبا کورونا وائرس کے بڑھتے ہوئے واقعات سے شریعت کے احکامات کو پس پردہ نہیں رکھا جا سکتا ہے۔'
انہوں نے عوام سے تلقین کی کہ ’’قربانی جیسی عبادت کو ترک نہیں کیا جانا چاہئے البتہ ماہرین صحت کی جانب سے وضع کیے گئے احکامات اور رہنمایانہ خطوط کی پاسداری کرتے ہوئے سنت ابراہیمی کا یہ عمل ادا کیا جانا چاہئے۔‘‘
قربانی کے گوشت کی تقسیم کے حوالے سے قاضی فاروق نے کہا: ’’ضروری نہیں کہ قربانی کا گوشت دور دراز علاقہ جات تک پہنچایا جائے، بلکہ اسے گھر میں استعمال کرنے کے علاوہ نزدیکی افرد تک ہی اگر پہنچایا جائے تو کوئی مضائقہ نہیں۔‘‘
