پلوامہ میں نوجوان لاپتہ، گھر والوں کی واپس لوٹنے کی اپیل

ویڈیو میں معراج کے والد کہتے ہیں "گھر سے پکنک جانے کے بعد معراج سے ہمارا کوئی فون رابطہ نہیں ہو پا رہا ہے۔ ہم بہت افسردہ ہیں اور جلد سے جلد اپنے بیٹے کو واپس لانا چاہتے ہیں۔"

جنوبی کشمیر کے ضلع پلوامہ میں ایک نوجوان کے بارے میں خدشہ ظاہر کیا جا رہا ہے کہ نوجوان نے مبینہ طور پر عسکریت پسندوں کی صف میں شمولیت اختیار کر لی ہے جبکہ اس کے والدین گھر واپسی کے لئے پُر نم انکھوں سے اپیل کر رہے ہیں۔

مذکورہ نوجوان کے والدین کے مطابق معراج الدین لون عرف بِٹہ مولوی ولد بشیر احمد لون اریگام گاؤں سے 4 جولائی کو اپنے دوستوں کے ساتھ پکنک (تفریح) پر گیا تھا۔ تاہم تب سے نوجوان گھر نہیں لوٹا ہے۔ نوجوان کے والدین اسے واپس لوٹنے کی مسلسل اپیل کر رہے ہیں۔

سوشل میڈیا پر وائرل ویڈیو میں گھر والے نوجوان کو گھر لوٹنے کی اپیل کر تے ہوئے دیکھے جا سکتے ہیں۔ اس کے کنبہ نے جذباتی التجا کی اور معراج الدین سے گھر واپس آنے کی اپیل کی۔

ویڈیو میں معراج کے والد کہتے ہیں "گھر سے پکنک جانے کے بعد معراج سے ہمارا کوئی فون رابطہ نہیں ہو پا رہا ہے۔ ہم بہت افسردہ ہیں اور جلد سے جلد اپنے بیٹے کو واپس لانا چاہتے ہیں۔"

اس کی ماں نے پرنم آنکھوں سے اپنے بیٹے سے گھر واپس آنے کی اپیل کی۔ اس کے والدہ نے آنسو بہاتے ہوئے کہا "میں صرف اپنے بیٹے کو واپس چاہتی ہوں۔ میں اس سے گھر آنے کو کہتی ہوں۔"

ویڈیو میں معراج کے گھر والے سکیورٹی ایجنسیوں و عوام سے اپیل کر رہے ہیں کہ ان کے بیٹے کو ڈھونڈنے میں ان کی مدد کی جائے۔