محکمہ وائلڈ لائف نے جہاں شمالی اور وسطی کشمیر کے علاقوں میں گزشتہ دنوں کئی جنگلی جانوروں کو پکڑ لیا ہے۔ وہیں جنوبی کشمیر کے ضلع پلوامہ کے وئین، پانپور علاقے میں محکمہ وائلڈ لائف کے اہلکاروں نے منگل کو ایک اور تیندوے کو پکڑ کر سات دنوں کے اندر تیسرے تیندوے کو پکڑنے میں کامیابی حاصل کر لی ہے۔
محکمہ وائلڈ لائف کے کھریو، ریجن کے ایک آفیسر نے کہا کہ انہیں پچھلے کئی دنوں سے وئین علاقے میں تیندوے کے ایک جھنڈ کی موجودگی کے بارے میں اطلاع موصول ہوئی جس کے بعد محکمہ کے اہلکاروں نے علاقے میں پہنچ کر ان جانوروں کو پکڑنے کے لئے پنجرے نصب کیے جس کے بعد گزشتہ دنوں دو تیندوے پکڑے گئے جبکہ منگل کو ٹیم نے تیسرے تیندوے کو پکڑنے میں کامیابی حاصل کرلی۔ اہلکاورں کے مطابق گزشتہ ایک ہفتے کے اندر علاقے سے پکڑا گیا یہ تیسرا تیندوا ہے۔
افسر نے کہا کہ محکمہ کے اہلکاروں نے دن رات کافی مشقت کر کے ان تیندوں کو پکڑنے میں کامیابی حاصل کرلی ہے۔ رینج افسر نے کہا کہ اطلاعات کے مطابق علاقے میں ابھی تیندوے کے دو بچے موجود ہیں، انہوں نے عوام سے شام کے وقت گھروں سے باہر نہ نکلنے کی اپیل کی۔
