پلوامہ: جموں و کشمیر کے ضلع پلوامہ میں سائبر کرائم کے نئے رجحانات سے عام لوگوں کو آگاہ کرنے کے لیے پلوامہ پولیس کی جانب سے سینٹرل ہائی اسکول پلوامہ میں ایک بیداری پروگرام منعقد کیا Cyber Crime Awareness Programme۔ سائبر کرائم سے متعلق آگاہی پروگرام میں پروفیسرز، لیکچررز، اساتذہ، طلباء، بینک ملازمین کے علاوہ عام شہریوں نے شرکت کی۔
ڈی وائی ایس پی ہیڈ کوارٹر پلوامہ نے سائبر جرائم پیشہ افراد کے ذریعہ کئے جانے والے آن لائن فراڈ کے حوالے سے افتتاحی تقریر کی۔ انہوں نے والدین کے کردار پر روشنی ڈالتے ہوئے کہا کہ بچے کی سماجی نشوونما میں والدین کی زیادہ ذمہ داری ہوتی ہے کیونکہ وہ اپنے بچوں کے پہلے اساتذہ اور رہنما کے طور پر کام کرتے ہیں۔
ایس ایچ او پلوامہ نے انہیں سائبر خطرات / سرگرمیوں مثلاً شناخت کی چوری، کریڈٹ کارڈ فراڈ، ڈیٹا چوری، سائبر اسٹالنگ، لڑکیوں کی تذلیل، فحاشی پھیلانے وغیرہ کے بارے میں بھی بریفنگ دی۔ اس کے بعد سائبر ماہرین نے یہ بھی معلومات فراہم کی کہ سائبر جرائم پیشہ افراد، کس طرح انٹرنیٹ کے ذریعے سائبر کرائم کو انجام دیتے ہیں۔ شرکاء کو E-Cop ایپلیکیشن اور اس کی خصوصیات کے بارے میں بھی آگاہ کیا گیا۔
