کاروان ختم نبوت صلی علیہ وسلم نام کی ایک مقامی مذہبی تنظیم نے منگل کو ترال کے ایک پرائیویٹ سکول میں یک روزہ سیمنار کا اہتمام کیا جس دوران علمائے کرام نے منشیات سمیت مختلف موضوعات پر مفصل روشنی ڈالی۔
اس موقع پر علمائے کرام نے معاشرے میں تیزی سے پھیل رہی منشیات کی وبا پر گہری تشویش کا اظہار کرتے ہوئے کہا کہ ’’اس لعنت کی وجہ سے سماج میں طرح طرح کے مسائل پیدا ہو رہے ہیں اور اگر ہوش کے ناخن نہ لیے گئے تو صورتحال خطرناک رخ اختیار کر سکتی ہے۔‘‘
ای ٹی وی بھارت کے ساتھ بات کرتے ہوئے کاروان ختم نبوت انٹرنیشنل کے سرپرست مفتی مدثر احمد قادری نے بتایا کہ اس وقت وادی کشمیر کے طول و ارض میں نوجوانوں کی بڑی تعداد منشیات میں مبتلا ہو رہی ہے اور اس کی سب سے بڑی وجہ دین سے دوری ہے۔
انہوں نے اس سیمنار کا مقصد بیان کرتے ہوئے کہا کہ ’’اس طرح کے سیمنارز سے نوجوانوں کو منشیات کی تباہ کاریوں اور اس سے سماج پر مرتب ہو رہے منفتی اثرات سے واقف کرایا جاتا ہے تاکہ نوجوان اس بری عادت سے دور رہ سکیں۔‘‘
مفتی مدثر قادری نے علمائے کرام کو مسالک و نظریات کی جنگ میں مبتلا ہونے کے بجائے اتحاد واتفاق کا مظاہرہ کرتے ہوئے منشیات کے خلاف منظم کارروائی کرنے کی اپیل کی۔
