جنوبی کشمیر کے ضلع پلوامہ میں سومو ڈرائیوروں نے انتظامیہ کے حالیہ حکمنامے جس میں ڈرائیوروں کو 50 فیصد مسافروں کے ساتھ سفر کرنے کی ہدایت دی گئی ہے، کے خلاف احتجاج کیا۔
واضح رہے کہ یوٹی انتظامیہ نے کووڈ 19 پھیلاؤ کو روکنے کے لیے محدود پیمانے کی پابندیاں عائد کی ہیں۔ نئی گائیڈ لائنز کے مطابق ٹرانسپورٹروں کو 50 فیصد سواریوں کے ساتھ ہی سفر کرنے کی اجازت دی گئی ہے۔
ٹرانسپورٹ سے جڑے افراد سرکاری حکم نامے سے نالاں ہیں، انہوں نے جمعرات کو ہڑتال کی، وہیں اس حکم نامے کے خلاف احتجاجی مظاہرہ بھی کیا۔ ان کا کہنا تھا کہ ’’اگر 10 کے بجائے 5 ہی مسافروں کو گاڑی میں بٹھانے کا حکنامہ صادر کیا گیا ہے تو پھر کرایہ میں بھی اضافہ بھی ہونا چاہیے۔‘‘
ڈرائیوروں نے بتایا کہ حکمنامہ جاری کرتے وقت ڈرائیوروں کی آمدن کو ملحوظ نہیں رکھا گیا۔ انہوں نے کہا کہ 50 فیصد سواریوں کے ساتھ سفر کرنے اور کرائے میں اضافہ نہ کیے جانے سے انہیں نفع کے بجائے نقصان سے دوچار ہونا پڑ رہا ہے۔
وہیں ٹرانسپورٹروں کی ہڑتال کے باعث مسافروں کو بھی دقتوں کا سامنا کرنا پڑا۔
