پلوامہ: وادی کشمیر کے دیگر اضلاع کی طرح جنوبی کشمیر کے ترال اور اونتی پورہ سب ڈویژنوں میں بھی بجلی کی ابتر صورتحال پر مقامی لوگوں میں ناراضگی پائی جا رہی ہے۔ تفصیلات کے مطابق ان علاقوں میں گزشتہ ایک ماہ سے بجلی کا بحران ہر گزرتے دن کے ساتھ بڑھتاہی جارہا ہے جس کی وجہ سے عام زندگی متاثر ہورہی ہے۔ امتحانات کی تیاری کرنے والے طلبا کے لیے بجلی کی آنکھ مچولی پریشانی کا سبب ہے۔ وہیں اس حوالے سے عوامی سطح پر کی جانے والی ہر فریاد صدا بہ صحرا ثابت ہو رہی ہے۔
مقامی لوگوں کے بقول بجلی محکمہ کی جانب سے جو شیڈول مرتب کیا گیا ہے اس پر بھی عمل درآمد کرنے میں محکمہ بالکل ناکام ہورہا ہے اور اس طرح سردی کے ان ایام میں لوگ پریشان ہیں۔ مقامی لوگوں کے مطابق بجلی فیس میں بھی گزشتہ برسوں کے دوران اضافہ کیا گیا ہے لیکن اس کے باوجود امسال سردیاں شروع ہوتے ہی محکمہ کی ناقص کارکردگی سے عوام کو مشکلات پیش آرہی ہیں۔
یہ بھی پڑھیں: ترال، زراڈی ہارڈ کی آبادی بنیادی سہولیات سے محروم
ترال اور اونتی پورہ کی جملہ آبادی نے ایل جی منوج سنھا سے اس سلسلہ میں فوری مداخلت کی اپیل کی ہے۔ محکمہ کے ایک عہدیدار محمد اشرف خطیب نے بتایا کہ مقامی سطح پر ہم بجلی نہیں کاٹتے ہیں بلکہ بمنہ گریڈ سے ہی لوڈ کو زیرو کرنے کے احکامات صادر کیے جاتے ہیں۔
