ضلع انتظامیہ پلوامہ نے بی ایم او ترال کو ڈیوٹی سے غفلت برتنے اور قرنطینہ مرکز سے ٹیسٹ رپورٹ آنے سے قبل ہی چھ افراد کو قرنطینہ مرکز سے ڈسچارج کرنے پر انکوائری کا حکم دیا ہے۔
نمائندے کے مطابق مذکورہ بی ایم او نے ’’تمام قواعد و ضوابط کو بالائے طاق رکھتے ہوئے چھ افراد کو ترال کے ایک قرنطینہ مرکز سے لازمی ٹیسٹ کی رپورٹ آنے سے قبل ہی چھٹی دی تھی۔‘‘
فارغ کیے جانے والے افراد کو بیرون وادی سے سیدھے ترال کے قرنطینہ مرکز میں لایا گیا تھا جن کے ٹیسٹ کل مثبت پائے گئے۔
جمعرات کو ضلع انتظامیہ پلوامہ نے معاملے کی حساسیت کو سمجھتے ہوئے بی ایم او ترال کے خلاف انکوائری کا حکم دیا ہے اور اے ڈی سی ترال کی سربراہی میں ایک کمیٹی کو تین روز کے اندر رپورٹ داخل کرنے کو کہا گیا ہے کیونکہ ’’مذکورہ آفیسر کی غفلت سے درجنوں افراد کی زندگیاں داؤ پر لگ گئی ہیں۔‘‘
ادھر عوامی حلقوں نے ضلع انتظامیہ کی اس پہل کو خوش آئند قرار دیتے ہوئے تمام ملوث ملازمین کے خلاف کارروائی کی اپیل کی ہے۔
