پانپور: قصابوں کے خلاف انتظامیہ کی کارروائی

جنوبی کشمیر کے قصبہ پانپور میں محکمہ فوڈ اینڈ سیفٹی کی جانب سے گراں فروشی اور خلاف کارروائی کے دوران کھریو علاقے میں ڈمپ کیا ہوا گوشت ضبط کرکے قصاب کے خلاف مقدمہ درج کیا گیا۔

محکمہ فوڈ اینڈ سیفٹی نے میونسپل کمیٹی کھریو کے اشتراک سے شکایت ملنے کے بعد کھریو علاقے میں موجود قصابوں کی دکانوں پر چھاپے مارے جس دوران ٹیم نے نعیم احمد نامی ایک گوشت فروش کی دکان سے کئی دنوں سے ڈمپ کیا ہوا گوشت برآمد کیا۔

گوشت فروش نے گوشت کو فریزر میں رکھا ہوا تھا جسے ٹیم نے ضبط کرنے کے بعد اسے فوری طور ضائع کر دیا اور نعیم کے خلاف پولیس اسٹیشن کھریو میں معاملہ درج کیا۔

اس موقع پر ٹی ایس او نے کہا کہ قانون کی خلاف ورزی کرنے والوں کو سخت سزا دی جائے گی۔

انہوں نے دکانداروں خصوصاً قصابوں سے اپیل کی کہ وہ انتظامیہ کی جانب سے مقرر کردہ قیمتوں پر ہی گوشت فروخت کریں۔ بصورت دیگر ان کے خلاف قانونی کارروائی عمل میں لائی جائے گی۔