پلوامہ: دریائے جہلم سے ایک لڑکی کی لاش برآمد

ضلع پلوامہ کے فرستہ بل پانپور میں دریائے جہلم سے ایک لڑکی کی لاش برآمد ہوئی ہے۔ یہ لڑکی 18جنوری سے گھر سے لاپتہ تھی۔

ضلع پلوامہ کے قصبہ پانپور کے فرستہ بل میں واقع دریائے جہلم سے پولیس اور مقامی لوگوں نے ایک جواں سالہ لڑکی کی لاش برآمد کی ہے۔ پولیس نے لڑکی کی شناخت رخسانہ علی دختر علی محمد ساکن شار شالی کے طور پر کی ہے۔

اطلاعات کے مطابق رخسانہ علی 18جنوری کو گھر سے لاپتہ ہوٸی تھی۔ لڑکی کے گھر والوں نے پولیس اسٹیشن کھریو میں گمشدگی کی شکایت درج کرائی تھی۔ تاہم آج تقریباً ایک ماہ بعد لڑکی کی لاش کو فرستہ بل پانپور کے لوگوں نے دریائے جہلم میں دیکھا۔ مقامی لوگوں نے فوراً پولیس کو اطلاع دی۔ پولیس نے موقع پر پہنچ کر مقامی لوگوں کے تعاون سے لاش کو دریائے جہلم سے باہر نکالا۔

جہلم سے لاش کو برآمد کرنے کے بعد لواحقین نے لاش کی شناخت کی۔ ایس ڈی ایچ پانپور میں لاش کے پوسٹ مارٹم کے بعد آخری رسومات کے لئے اسے لواحقین کے حوالے کیا گیا۔ پولیس نے اس سلسلے میں کیس درج کر کے مزید تحقیقات شروع کر دی ہیں۔