ضلع پلوامہ کے حلقہ انتخاب ترال میں دس امیدواروں نے ڈی ڈی سی انتخابات کے لیے پرچہ نامزدگی جمع کرائے ہیں اور انتخابی مہم کا آغاز بھی ہو چکا ہے، تاہم ترال جیسے حساس علاقے میں معقول سیکورٹی بھی امیدواروں کے لیے ایک بڑا مسئلہ بنا ہوا ہے۔
ترال حلقے سے بھارتیہ جنتا پارٹی (بی جے پی) کے نامزد امیدوار عبدالرشید گوجر نے آبائی علاقے دودھ مرگ سے اپنے انتخابی مہم کا آغاز کیا جس دوران موصوف نے متعدد عوامی وفود سے ملاقات کی اور ان کو انتخابات میں بڑھ چڑھ کر حصہ لینے کی اپیل کی۔
ای ٹی وی بھارت کے ساتھ بات کرتے ہوئے عبدالرشید نے الزام عائد کیا کہ ’’سرکار ایکطرف ڈی ڈی سی انتخابات کے کامیاب انعقاد کے لئے اقدامات کرنے کے دعوے کر رہی ہے وہیں دوسری جانب امیدواروں کو معقول سیکورٹی فراہم نہیں کی رہی ہے جسکی وجہ سے وہ اپنی مہم احسن طریقے سے انجام نہیں دے پاتے۔‘‘
عبدالرشید نے مزید کہا کہ انہوں نے دور افتادہ علاقے دودھ مرگ سے اپنی انتخابی مہم کو شروع کیا تاہم معقول سیکورٹی نہ ہونے کی وجہ وہ اپنی بات صحیح ڈھنگ سے عوام تک نہیں پہنچا پائے۔
انہوں نے مزید کہا کہ وہ الیکشن میں شامل ہوئے ہیں تاہم اگر سرکار نے انہیں معقول سیکورٹی فراہم نہیں کی تو وہ اپنے فیصلے پر نظرثانی کریں گے۔
