پلوامہ، ترال: کانگریس کے سینئر لیڈر اور جنرل سیکریٹری سریندر سنگھ چنئی نے پلوامہ ضلع کے ترال کے بالائی علاقے دودھ مرگ، ناگہ پتھری، وزل کلناڈ اور مضافاتی گاؤں کا دورہ کر عوامی وفود سے ملاقات کی۔ اس دوران لوگوں نے اپنے مسائل سے انہیں روشناس کرایا، جسے چنئی سنگھ نے سنا اور ان پر ہمدردانہ غور و خوض کرنے کی یقین دہانی کرائی، انھیں یقین دلایا کہ ان کے مسائل کو انتظامیہ کی نوٹس میں لایا جائے گا۔
سریندر سنگھ چنئی نے ای ٹی وی بھارت سے بات کرتے ہوئے کہا کہ ترال میں بجلی بحران ہر گزرتے دن کے ساتھ شدت اختیار کررہا ہے اور انتظامیہ کے دعوے اس حوالے سے سچ ثابت نہیں ہورہے ہیں جب کہ ترال کے بالائی علاقوں میں مواصلاتی نظام نہ ہونے سے عوام کو جدید دور میں بھی زبردست مشکلات درپیش ہیں جب کہ جانوروں کی دیکھ بھال کرنے والے افراد کی شکایت ہے کہ علاقے میں ویٹرنری سہولیات دستیاب نہیں ہے۔
سریندر سنگھ چنئی نے ایل جی انتظامیہ سے اپیل کی کہ ترال میں بجلی سپلائی میں معقولیت لانے کے علاوہ دیگر معاملات کی طرف بھی توجہ دی جائے۔
