ترال میں بی جے پی امیدوار کی انتخابی مہم

ڈی ڈی سی انتخابات کے دوسرے مرحلے کے لیے یکم دسمبر کو ووٹنگ ہو گی۔ اس تناظر میں ہر پارٹی کے امیدوار ووٹروں کو لبھانے کے لیے چناوی مہم میں تیزی لا رہے ہیں۔

تفصیلات کے مطابق بی جے پی امیدوار عبدالرشید گوجر نے دودھ مرگ، چھترگام اور دوسرے دیہات کا دورہ کیا اور عوام کو یقین دلایا کہ صرف بھاجپا ہی دور دراز علاقوں کی تعمیر وترقی کے لیے کام کر سکتی ہے۔

دودھ مرگ میں ایک چناوی جلسے سے خطاب کرتے ہوئے عبدالرشید گوجر نے لوگوں کو روایتی سیاستدانوں سے دور رہنے کی تلقین کی انہوں نے الازم عائد کیا کہ ان سیاستدانوں نے گزشتہ ستر برسوں کے دوران گجر برادری کو لوٹا ہے اس موقع پر مقامی شہریوں نے عہد کیا کہ وہ اب کی بار اپنے ہی امیدوار کو کامیاب بناییں گے۔

ای ٹی وی بھارت کے ساتھ بات کرتے ہوئے بی جے پی کے نامزد امیدوار عبدالرشید گوجر نے بتایا کہ ترال میں پہلی بار ایک ایس ٹی امیدوار کو منڈدیٹ دیا گیا ہے اور اسی لیے گجر رہنما اب انتخابات میں کود گیے ہیں جبکہ گزشتہ انتخابات میں وہ لوگ تماشہ دیکھنے میں مصروف تھے۔

انھوں نے مزید بتایا کہ وہ ترال کی سیٹ پر بھاری اکثریت سے کامیاب ہوں گے اور ان طاقتوں کو جواب دیں گے جو برادری کو گمراہ کر رہے ہیں

واضح رہے کہ جموں و کشمیر میں پہلی بار ڈی ڈی سی انتخابات 28 نومبر سے ہو رہے ہیں۔ یہ انتخابات 8 مرحلوں میں منعقد ہونگے۔ 22 دسمبر کو ووٹنگ کی گنتی ہوگی۔