پلوامہ: جنوبی کشمیر کے ضلع پلوامہ میں پاریگام علاقے کے باشندوں نے محکمہ تعمیرات عامہ کے خلاف احتجاج کرتے ہوئے سڑک کی فوری طور مرمت کرنے کا مطالبہ کیا۔ احتجاج میں شامل پاریگام علاقے کے باشندوں نے دعویٰ کیا کہ قریباً ایک ماہ قبل علاقے کی اندرون سڑک کی مرمت کا کام شروع کرنے کے لئے مواد (بجری) سڑک کے بیچوں بیچ انڈیل دی گئی۔ لوگوں نے کہا کہ ایک ماہ سے بھی طویل عرصہ سے میٹیریل یہیں پڑا ہوا ہے تاہم سڑک کی تعمیر و مرمت کا کام شروع نہیں کیا جا رہا۔
پاریگام علاقے کے باشندوں نے مزید کہا کہ علاقے کی اندرون سڑک کافی خستہ حال ہو چکی تھی جس کے حوالہ سے لوگوں کو سخت پریشانیوں کا سامنا کرنا پڑ رہا رہا ہے۔ انہوں نے کہا کہ برسوں سے احتجاج، درخواست اور مطالبات کے بعد بالآخر سڑک کی مرمت کو منظوری دی گئی اور متعلقہ محکمہ کی جانب سے میٹیریل انڈیل دیا گیا۔ لوگوں نے بتایا کہ عوامی اصرار کے بعد سڑک کی مرمت اور میگڈمائزیشن کو منظوری ملنے کے بعد لوگوں میں خوشی کی لہر دوڑ گئی تاہم مواد انڈیلنے کے باوجود کام شروع نہیں کیا گیا بلکہ میٹیریل سڑک کے بیچوں بیچ ڈال کر عوامی مشکلات میں کمی کے بجائے اضافہ کیا گیا ہے۔
مزید پڑھیں: کاکاپورہ کی اندرونی سڑکیں خستہ حال
احتجاج کر رہے لوگوں نے بتایا کہ سڑک کے بیچوں بیچ میٹیریل انڈیلنے سے لوگوں کو عبور و مرور میں مزید دقتوں کا سامنا کرنا پڑ رہا ہے۔ انہوں نے ضلع انتظامیہ سمیت متعلقہ محکمہ، آر اینڈ بی، سے فوری طور پر سڑک کی تعمیر و مرمت کا کام شروع کیے جانے اور عوام کو راحت پہنچانے کی اپیل کی ہے۔