این سی اور پی ڈی پی نے قبرستان آباد کیے: عمر جان

JKAP Leader Omer Jan on NC and PDP: وادی کشمیر میں گذشتہ کئی دہائیوں سے جاری خون خرابے اور تباہی کے لیے نیشنل کانفرنس اور پی ڈی پی کو ذمہ دار قرار دیتے ہوئے جموں و کشمیر اپنی پارٹی کے رہنما عمر جان نے دعوی کیا کہ اپنی پارٹی ان پارٹیوں کو بے نقاب کرے گی اور ان کی استحصالی سیاست کی قبا چاک کرے گی۔

ترال: جنوبی کشمیر کے ترال علاقے میں ورکرز کنونشن کے حاشیے پر اپنی پارٹی کے پروژنل سیکرٹری عمر جان نے ای ٹی وی بھارت کے نمائندے سے خصوصی بات چیت میں کشمیر کی موجودہ صورت حال کے لیے پی ڈی پی اور این سی کو ذمہ دار ٹھہرایا۔ انہوں نے کہا کہ جموں و کشمیر اپنی پارٹی وادی کے اطراف و اکناف میں ان دنوں عوامی میٹینگز کا انعقاد کر رہی ہے اور اسمبلی انتخابات کے پیش نظر اپنا ایجنڈا عوام کے سامنے رکھ رہی ہے۔ ان کے مطابق اپنی پارٹی کھوکھلے نعروں کے بجائے سچ کی سیاست کر رہی ہے۔

یہ پوچھے جانے پر کہ عوامی سطح پر اپنی پارٹی کو مرکز کی سرپرستی حاصل ہونے کی باتیں کی جاتی ہیں، انہوں نے جواباً کہا کہ یہ سارا پروپگینڈہ ان پارٹیوں کا ہے جن کو آج تک مرکز کا آشیرواد ملا رہا ہے اور جنھوں نے یہاں قبرستان آباد کیے۔ تاہم اپنی پارٹی کے صدر الطاف بخاری جب بھی مرکز کے پاس جاتے ہیں تو دن کے اجالے میں جاتے ہیں، رات کے اندھیرے میں نہیں جاتے۔

عمر جان نے بتایا کہ پارلیمانی انتخابات کے حوالے سے ماحول بننا شروع ہوا ہے اور اس حوالے سے پارٹی ہائی کمان فیصلہ لے گی اور امید ہے کہ سبھی نشتسوں پر ہم امیدوار کھڑا کریں گے۔ انہوں نے مانگ کی کہ جموں و کشمیر میں اسمبلی انتخابات بھی منعقد ہونے چاہئیں تاکہ یہاں ایک عوامی حکومت برسراقتدار آسکے اور عوامی مسائل کا ازالہ ممکن ہو سکے۔