ضلع پونچھ میں منڈی سے سوجیاں جا رہی ایک سوسو گاڑی زیر نمبر JK12B 1646 حادثہ کا شکار ہوگئی۔ جس میں سوار سبھی 9افراد زخمی ہو گئے۔
زخمیوں کو فوری طور پر نزدیکی طبی مرکز پہنچایا گیا تاہم زخمیوں میں ایک حاملہ خاتون بھی شامل تھی جسے ابتدائی طبی امداد کے بعد سب ضلع ہسپتال منڈی پہنچایا گیا جہاں سے بہتر علاج و معالجے کے لیے انہیں ضلع ہسپتال پونچھ ریفرکردیاگیا۔
مذکورہ سومو گاڑی منڈی سے سوجیاں کی طرف جا رہی تھی اور گزشتہ رات ہوئی برفباری کے سبب سڑک پر کافی پھسلن تھی اور سومو گاڑی بے قابو ہوکر گہرے نالے میں جا گری، تاہم برف ہونے کے سبب سواریوں کو معمولی چوٹیں آئیں۔
زخموں کی شناخت فاروق احمد ولد غلام محمد عمر 24 سال ساکنہ سوجیاں، نجمہ بیگم زوجہ فاروق احمد عمر 24 ساکنہ گگڑیاں، مجیدہ بیگم زوجہ محمد شفیع عمر 50 سال، عامر علی ولد علی محمد عمر 26 سال، آکاش احمد ولد عاشق پرے عمر 30 سال، شکیل احمد ولد محمد ابراہیم عمر 40 سال، جہانگیر احمد ولد عبد الحمید عمر 25 سال، فریدہ بیگم زوجہ صدام حسین عمر 32سال، سلیمہ بیگم زوجہ محمد آصف عمر 35 سال، کے طور پر کی گئی ہے۔
