جموں وکشمیر میں بھی دیگر ریاستوں کی طرح عالمی وبا کورونا وائرس کو مزید پھیلنے سے روکنے کے لیے لاک ڈاون نافذ ہے۔ لاک ڈائون کی وجہ سے جہاں عام زندگی کافی حد تک متاثر ہو چکی ہے وہیں بعض فلاحی ادارے مستحق و غریب عوام کی مدد کے لیے سامنے آ رہے ہیں۔
سرحدی ضلع پونچھ میں ایک مقامی غیر سرکاری تنظیم ’’میلاد کمیٹی‘‘ کی جانب سے تحصیل منڈی کے متعدد مقامات پر مستحق افراد میں راشن مفت تقسیم کیا گیا۔ جن میں ساوجیاں، گگڑیاں گلی میدان، بیدار، گھوڑہ نک، بیلہ بالا، وغیرہ شامل ہیں۔
میلاد کمیٹی کے چیرمین نے بتایا کہ سرحدی علاقہ پونچھ کے اکثر نوجوان مزدوری کے لیے دیگر ریاستوں کا رخ کرتے ہیں تاہم لاک ڈائون کے دوران وہ گھروں میں ہی محصور ہو کر رہ گئے ہیں اور ایسے افراد کے لیے اپنے اور اہل خانہ کے نان شبینہ کا انتظام کرنا دشوار ہو رہا ہے۔
انہوں نے کہا کہ ایسے وقت میں سبھی افراد خصوصا فلاحی اداروں اور صاحب ثروت افراد کو غریبوں اور حاجت مند افراد کی امداد کے لیے آگے آنا چاہئے، ’’تاکہ بے سہارا لوگ اس وبائی صورتحال میں فاقہ کشی سے بچ سکیں۔‘‘
