ڈپٹی کمشنر پونچھ اندر جیت نے منگل کو کورونا وائرس مثبت معاملات میں اچانک اضافے کی وجہ سے پیدا ہونے والی صورتحال کا جائزہ لینے کے لئے محکمہ صحت کے عملہ کے ساتھ ایک اجلاس طلب کیا۔
اجلاس کے دوران نوڈل آفیسرز نے کورونا کی دوسری لہر کے دوران رپورٹ ہونے والے مثبت معاملات کے علاوہ وائرس کے پھیلاؤ پر قابو پانے اور ضلع میں ویکسینیشن کے عمل کے بارے میں تفصیلی بریفنگ دی۔
ڈپٹی کمشنر نے تشویشناک صورتحال کے پیش نظر محکمہ صحت اور دیگر اسٹیک ہولڈرز پر زور دیا کہ وہ مثبت معاملات کی کڑی نگرانی کرنے کے علاوہ وائرس کے پھیلائو کو کم کرنے کے لئے تمام ضروری اقدامات اٹھائیں۔
انہوں نے افسران کو کورونا متاثرہ افراد خصوصا 60 سال سے زیادہ عمر والے افراد کی نشاندہی پر بھی زور دیا تاکہ ویکسینیشن کا عمل ضوابط کے تحت مقررہ وقت کے اندر مکمل کیا جا سکے۔
ڈی سی پونچھ نے عوام میں رہنما خطوط کی پاسداری اور کووڈ سے بچائو کے طریقوں کو عام کرنے کے سلسلے میں مذہبی رہنائوں کی مدد حاصل کرنے پر بھی زور دیا۔
انہوں نے بیرون ممالک سے لوٹنے والے افراد کا ٹیسٹ کیے جانے کے علاوہ گھروں میں قرنطینہ کو بھی یقینی بنائے جانے سے متعلق اقدامات اٹھانے پر زور دیا۔
انہوں نے افسران کو بلاک دیوس اور دیگر سماجی پروگراموں کے دوران رہنما خطوط خصوصا ماسک پہننے اور سماجی فاصلہ برقرار رکھنے سے متعلق عوامی آگہی پر بھی زور دیا۔
میٹنگ کے دوران چیف میڈیکل آفیسر پونچھ، میڈیکل سپرانٹنڈینٹ ضلع اسپتال پونچھ، بی ایم اوز اور نوڈل افسران برائے کووڈ19 کے علاوہ دیگر افسران بھی موجود تھے۔
