Soldier found Dead in Poonch: اپنی ہی سروس رائفل سے نکلنے والی گولی سے فوجی ہلاک

سرحدی ضلع پونچھ میں تعینات ایک اگنی ویر کی خون میں لت پت لاش برآمد ہوئی۔ پولیس کا کہنا ہے کہ اگنی ویر کی موت اپنی ہی سروس رائفل سے نکلنے والی گولی ہوئی ہے، تاہم پولیس اس بات کی تحقیقات کر رہی ہے کہ فوجی نے خود کشی کی یا گولی حادثاتی طور خارج ہوئی۔

پونچھ (جموں کشمیر) : جموں و کشمیر کے سرحدی ضلع پونچھ میں لائن آف کنٹرول کے قریب اپنی ہی سروس رائفل سے گولی لگنے سے ایک فوجی (اگنی ویر) کی موت واقع ہو گئی۔ پولیس نے بدھ کو یہ معلومات فراہم کی۔ پولیس میڈیا بیان میں کہا گیا کہ کانسٹیبل امرت پال سنگھ (اگنی ویر) منکوٹ سیکٹر میں فارورڈ پوسٹ پر تعینات تھے، صبح پانچ بجے گولی چلنے کی آواز آنے کے بعد سنگھ کا ایک ساتھی وہاں پہنچا اور سنگھ کو خون میں لت پت پایا۔

پولیس بیان کے مطابق ابتدائی تحقیقات سے پتہ چلا ہے کہ سنگھ اپنی ہی سروس رائفل سے خارج ہونے والی گولی سے ہلاک ہوا ہے۔ پولیس افسر نے کہا کہ اس بات کی جانچ کی جائے گی کہ فوجی نے خودکشی کی ہے یا اس کی سروس رائفل سے حادثاتی طور گولی چلی ہے۔ انہوں نے مزید کہا کہ پولیس نے معاملہ درج کرکے اس ضمن میں مزید تحقیقات شروع کر دی ہے۔

یاد رہے کہ گزشتہ ہفتے سرحدی ضلع راجوری کے ڈنگری علاقے میں فوج نے ایک میجر رینک کے افسر کے خلاف کورٹ آف انکوائری شروع کی جس پر اپنے فوجی ساتھیوں پر گولیاں چلانے اور آرمی کیمپ کے اندر گرنیڈ دھمکہ کرنے کا الزام ہے۔ فوجی ذرائع کے مطابق میجر کی جانب سے کیے گئے حملہ میں ایک فوجی اہلکار ہلاک جبکہ پانچ دیگر زخمی ہو گئے ہیں۔ فوجی کیمپس میں خودکشی اور برادر کشی کے بڑھتے واقعات پر ماہرین نے گہری تشویش کا اظہار کیا۔