مہاراشٹر کے دارالحکومت ممبئی کے کرلا علاقے میں بدھ کے روز دوپہر بعد کرلا ریلوے اسٹیشن کے باہر جماعت اسلامی ہند ممبئی کی خواتین کی جانب سے ہاتھرس واقعے کے خلاف خاموش احتجاج کیا گیا۔
احتجاج میں کرلا جماعت کی درجنوں خواتین نے حصہ لیا، دورانِ احتجاج خواتین نے اپنے غم و غصّے کا اظہار کرتے ہوئے اس معاملے میں پولیس و انتظامیہ کی سرد مہری پر بھی اپنی ناراضگی ظاہر کی۔
واضح رہے کہ اترپردیش کے ضلع ہاتھرس میں پیش آئے اجتماعی جنسی زیادتی کے واقعہ کو کئی دن گزر چکا ہے لیکن اب تک حکومت نے ملزمین کے خلاف خطر خواہ کارروائی نہ کرنے کا الزام ہر کوئی کررہا ہے۔
احتجاج میں شامل خواتین کا کہنا ہے کہ آخر اترپردیش حکومت اِس قسم کی سنگین واردات پر اتنی عدم توجہی کا مظاہرہ کیوں کر رہی ہے؟ اور اس پر کمال کی بات یہ ہے کہ مرکز بھی اس تعلق سے واضح رہنمائی یا احکامات کو صادر نہیں کر رہا ہے۔
کرلا ریلوے اسٹیشن کے باہر احتجاج کررہی خواتین نے جنسی زیادتی اور قتل کرنے والے تمام ملزمین کے خلاف فوری مقدمہ درج کر انھیں عبرت ناک سزا دینے کا مطالبہ کیا۔
