ریاست مہاراشٹر کے مالیگاؤں کے ایک ہسپتال میں وارڈ بوائے کی خدمات انجام دے رہے شمشیر خان نے کورونا سے متعلق بات چیت کے دوران کہا کہ 'بیماری سے ڈریں نہیں بلکہ ہمت سے لڑیں اور احتیاط و علاج جاری رکھیں تو کورونا سے مقابلہ جیتا جاسکتا ہے۔
ای ٹی وی بھارت پر شمشیر خان نے ایک وارڈ بوائے کی کورونا ہسپتال میں بے لوث خدمات کو اجاگر کیا۔ انہوں نے کہا کہ 'انہیں ٹریننگ کے دوران سب سے پہلے بتایا گیا تھا کہ کسی بھی مریض کو بلا امتیاز ان کی ہر ضرورت کو پوری کرنے کی کوشش کرنا ہے انھیں حوصلہ دینا ہے۔'
شمشیر نے بتایا کہ مالیگاؤں کارپوریشن کی جانب سے کورونا ہسپتالوں میں مختلف آسامیاں نکلی تھی۔ ان کا انتخاب وارڈ بوائے کے لئے ہوا۔ ان کے جذبہ خدمت و ہمت کو دیکھتے ہوئے ان کا انتخاب کیا گیا۔'
شمشیر نیا فاران ہسپتال میں کورونا مریضوں کی دیکھ ریکھ، کھانا پینا، دواگولی اور تیمارداری کے کام کو ایمانداری سے انجام دے رہے ہیں۔ انھیں ان کی حفاظت کے لئے پی پی ای کٹ دی جاتی ہے۔ ان کی خدمات کو دیکھتے ہوئے جب مریض صحت یاب ہوکر جاتے ہیں تو انہیں دعاؤں سے نوازتے ہیں۔
انہوں نے بتایا کہ 'زندگی میں اتنی اموات کبھی نہیں دیکھی۔ لیکن ان اموات میں کورونا کی وجہ سے کم اور دیگر مریضوں کی تعداد زیادہ ہے۔'
شمشیر نے کہا کہ 'زیادہ تر مریضوں کو آخری وقت میں ہسپتال لایا جاتا تھا جہاں ان کا انتقال ہو جاتا ہے۔'
