اورنگ آباد کے سلیم علی سرور تالاب میں شہریان کو ایک انوکھا احتجاج دیکھنے کو ملا۔ پھلمبری سے تعلق رکھنے والا کسان منگیش سابڑے ٹیوب کی مدد سے تالاب میں تیرنے لگا، اس کے پاس ایک بوتل بھی تھی۔ خود کو کسان بتاتے ہوئے اس نوجوان نے ضلع انتظامیہ پر کسانوں کے ساتھ دھوکہ دہی کا الزام عائد کیا۔
اس کا کہنا تھا کہ 'مراٹھواڑہ میں ہوئی موسلادھار بارش کی وجہ سے کسانوں کی ہزاروں ایکڑ پر کھڑی فصلیں تباہ ہوگئی لیکن انتظامیہ کی جانب سے ابھی تک کوئی مدد نہیں ملی۔
نوجوان کا دعوی ہے کہ بار بار نمائندگی کے باوجود ضلع کلکٹر نے کوئی دھیان نہیں دیا جس سے بیزار ہوکر اس نے جل سمادھی لینے کا فیصلہ کیا۔
دو گھنٹے تک جاری اس احتجاج کے دوران پولیس افسران کی درخواست اور ڈیویژنل کمشنر سے ملاقات کی یقین دہانی کے بعد منگیش سابڑے نے جل سمادھی کا فیصلہ واپس لیا اور اسے بحفاظت تالاب سے باہر نکال لیا گیا۔
