ادھو ٹھاکرے کی عوام سے کورونا ہدایات پر عمل کرنے کی اپیل

مہاراشٹر کے وزیر اعلیٰ ادھو ٹھاکرے نے ریاست میں ایک اور لاک ڈاؤن سے بچنے کے لئے لوگوں سے کورونا وائرس (کووڈ -19) سے متعلق رہنما اصولوں پر عمل کرنے کی اپیل کی ہے۔ انہوں نے کہا کہ کورونا ایک بار پھر سے پھیل رہا ہے اور ہمارے پاس گائڈ لائنس پر عمل کرنے کے علاوہ اور کوئی چارہ نہیں ہے۔

مہاراشٹر کے سی ایم ادھو ٹھاکرے نے لوگوں کو متنبہ کیا کہ اگر کووڈ 19 کے رہنما اصولوں پر عمل نہیں کیا گیا تو ریاست کے پاس لاک ڈاؤن نافذ کرنے کے علاوہ اور کوئی چارہ نہیں ہوگا۔

جمعہ کی شام کورونا سے متاثرہ نندوربار ضلع کا دورہ کرنے کے موقع پر وزیر اعلیٰ نے کہا کہ اگر لوگ کورونا کے رہنما خطوط پر عمل نہیں کرتے ہیں تو ریاست کے پاس لاک ڈاؤن نافذ کرنے کے سوا کوئی دوسرا راستہ نہیں بچ سکے گا۔

انہوں نے کہا کہ اب صورتِ حال مزید خراب ہوچکی ہے۔

ٹھاکرے نے کہا کہ لاک ڈاؤن سے بچنے کا واحد طریقہ یہ ہے کہ لوگ ویکسین لینے کے بعد بھی کووڈ 19 کے رہنما اصولوں پر عمل کریں اور حکومت کے ساتھ تعاون کریں کیونکہ حکومت عوام کے لیے ہی ہے اور عوام کے ساتھ ہے مگر عوام کی بھی ذمہ داری یہ ہے کہ وہ حکومت کی جانب سے دی گئی ہدایات پر عمل کریں۔

یو این آئی