مہاراشٹر کے دارالحکومت ممبئی سے متصل پاورلوم صنعتی شہر بھیونڈی کے پیرانی پاڑہ علاقے میں رات تقریباً 7:30 بجے ایک چار منزلہ عمارت کا پلر کریک ہونے لگا، جسے دیکھ کر عمارت کے مکینوں میں زبردست سراسیمگی پھیل گئی۔
اس کی اطلاع موصول ہوتے ہی میونسپل کارپوریشن انتظامیہ کے افسران اور فائر بریگیڈ کی ٹیم جائے حادثے پر پہنچی اور عمارت میں رہائش پذیر 22 خاندانوں کو باہر نکال کر میونسپل انتظامیہ کے افسران رات تقریباً ایک بجے لوٹ گئے۔
اسی درمیان کئی خاندان اپنا قیمتی سامان نکالنے واپس عمارت میں داخل ہوئے تھے، ابھی کچھ ہی سامان نکال پائے تھے کہ رات تقریباً 1:15 بجے پوری عمارت زمیں بوس ہوگئی اور عمارت سے سامان نکال رہے افراد ملبے میں دب گئے۔ عمارت کے گرنے سے ہونے والی آواز اور غبار سے زبردست افرا تفری مچ گئی۔
مقامی افراد نے فوراً پہنچ کر راحت رسانی کا کام شروع کیا اور عمارت کے ملبے سے پانچ افراد کو باہر نکالا، جن میں دو افراد ہلاک ہو گئے۔ جن کی شناخت سراج انور انصاری (26) اور عاقب انصاری (24) کے طور پر ہوئی اور تین افراد عبدالعزیز سید (65) جاوید شیخ، نظام الدین صدیقی شدید طور سے زخمی ہوگئے، جنہیں علاج کے لئے مقامی اندرا گاندھی ہسپتال میں داخل کرایا گیا، جہاں وہ زیر علاج ہیں۔
این ڈی آر ایف، ٹی ڈی آر ایف اور تھانے اور بھیونڈی میونسپل کارپوریشن کا عملہ ملبہ ہٹانے میں مصروف ہے۔ فی الحال ابھی بھی کچھ لوگوں کے ملبے میں پھنسے ہونے کے خدشہ ہے۔
